فكتوريا الخوري: “كلنا وطني” هي الخيار المدني الوحيد والموحد في المتن

فكتوريا الخوري: “كلنا وطني” هي الخيار المدني الوحيد والموحد في المتن

على الطريق البحرية، من شاطئ ساحل المتن حيث تمتزج رائحة النفايات مع رائحة الصرف صحي، من امام هذه الجريمة البيئية ، أُعلنت لائحة “كلنا وطني” في المتن. وتضم هذه اللائحة كل من اميل كنعان، شربل نحاس، نادين موسى، اديب طعمه، فكتوريا الخوري زوين، جورج الرحباني.

وقد القى كلمة كل من المرشحين، وقد جاء في كلمة فكتوريا الخوري التالي:

“قالوا المجتمع المدني مشرزم ما رح يخرق، قالوا اذا بيتوحد بصير في تغيير، قالوا ياريت منشوف لوايح وطنية، هيدا حلم….

بعد سنة ونص من العمل المتواصل، صار الحلم حقيقة! توحدنا !!! اكتر من ١٢ مجموعة اساسية، ناشطة، مدنية وسياسية قدرنا نحقق هل الحلم!

اليوم صار في بديل، بديل جدّي، ٦٦ مرشحة ومرشح، لايحة موحدة ب٩ دواير، تحالفات مبدئية ومش على القطعة وهجينة حسب كل دايرة!

٦٦ مرشح يعني اكتر من نص مجلس نواب، يعني نحنا مش حالة اعتراضية، نحنا مشروع سلطة بديلة.

الخيار بأيدكن!!!

٦ايار هو النهار!!! التغيير ما بصير غير بالصندوق!

بدنا ننزل ونوقف بالصف، وننطر سعات لنصوت “كلنا وطني”، لانو مننطر ساعة ومنرتاح ٤ سنين انو في مين يمثلنا بالمجلس!

ليش بتحرز ننطر؟ لأن جرايم كثيرة انعملت بحق هالوطن وجرايم كثيرة بحق المتن، وحدة من هالجريم هي تلويث هيدا الشط والبحر الشايفينو ورايي، تلويثن بمي المجارير. من ضمن برنامجنا انو نعمل محطة تكرير الصرف الصحي على الساحل وربطا بالشبكات الرئيسية المتفذة من سنين.
٦ ايار موعدنا!!!

انتبهوا، لازم يكون في وضوح بالرؤية! خيارنا بالمتن كتير واضح، في اربع لوايح حزبية او زعماتية ولايحة وحدة تغييرية مدنية! صوتوا “كلنا وطني”!